Uncategorized · التدويـنات الشهرية · تجارب شخصية · تغطيات

تغطية خاصة للسوق الصيني في البحرين.

مرحبا

رحت لسوق مرتين، وخطرت في بالي في الزيارة الثانية فكرة التغطية وأجيب لكم أحسن مافيه، السوق كبير وواسع، وممرات واسعة، بالرغم من تكرر البضاعة إلا أن فيه أرقام لكل محل تميّزه عن غيره.

نبدأ بالبداية، أذكركم أني ماعرف بالتغطيات شيء بس حاولت أقسم التغطية بهذه الطريقة، ويارب إني أحسنت فيها.

بالبداية، اسمه مدينة التنين (Dragon City) أو يسمونه باسم دارج وهو السوق الصيني في البحرين، تلقون بالطرق ولوحات الاتجاهات باسم مدينة التنين.

المشي مع اللوحات ما يضيّع، بس يعيب موقعه بُعده نوعًا ما، وتعدد اللوحات للوصول له، بس ترا يبيّن لكم إذا قرّبتوا من كبر حجمه. بس أنصح بزيارته في كل الأحوال، خاصة في حالة الرغبة بالشراء.

موقعه في ديّار المحرّق، وهذا رابط الموقع.

موقع السوق الصيني في البحرين

أوقات العمل فيه:

من يوم السبت إلى يوم الاربعا من الساعة 10 صباحًا إلى 10 مساءً.

يومي الخميس والجمعة من الساعة 10 صباحًا إلى الساعة 12 صباحًا.

يحتوي السوق على أكثر من 12 بوابة.

المحلات مقسّمة على عدة أقسام، وهي: الكترونيات، الملابس للكبار والأطفال، اثاث وديكورات المنزل والأواني، الإضاءات، الألعاب، مواد البناء والأدوات الصحية.

بكل جهة أو طريق داخل السوق، تلقون مجموعة محلات من كل قسم، يعني مشكّل.

السوق مثل ما قلت لكم مقسم ممرات، فالممرات تلتقي عند تقاطع، في التقاطع تلقون 4 أو 3 كافيهات في كل زاوية واحد، ماما إسطنبول، قدوع، ونسيت الثالث.

جرّبت ماما إسطنبول، لذيذ حلاهم، حبيت من عندهم الموكا الباردة وأهلي حبّوا الشاهي.

قدوع ما جربته، بس لهم محل داخل السوق يبيعون شوكولاتات، والتمر المحشي وغيره.

ماشفت مطاعم داخل السوق، بس فيه جهة جالسين يوسعون فيها، وكاتبين المطعم الآسيوي، يعني اللي جايين بالمستقبل إن شاء الله الخير جايكم.

تجربتي الشخصية

شريت في المرة الأولى، حافظة البطاقات جهتين وتسكر، ماأذكر المحل، بس أغلب المحلات عندهم أشكال مختلفة وأسعار متقاربة، حقتي ب 4,500 دينار بحريني، عندنا يعني 45 ريال.

نصيحتي، إذا ناوين تشترون شيء لا تكتفون من أول شكل أو أول محل، فرّوا وشوفوا أكثر لين تشوفون المناسب لكم من ناحية المنتج وشكله والسعر بعد.

وشرينا بعد لبس لأخواني الصغار، خامتهم حلوة وتنكرف يعني، بس اختاروا كويس والمسوا القماش.

وشرينا بعد كمادة الكهرباء، بس ماش خربت بسرعه، بالبداية كانت كويسة ثم بدت ما تحتر زين ثم تبرد بسرعة، وخلاص يأسنا منها. انتبهوا منها ترا تلقونها بكل محل وبتغليفات أقمشة مختلفة، بس أتوقع نفس الجودة، اللي هي ماتعتبر جودة. إذا حابين تجربوا بأنفسكم جرّبوا.

نصيحتي الأهم قبل ما تجون السوق، الاستعداد النفسي للمشي، والروقان، وتجون لهدف القهوة، والترويق.

ترا السوق أقل وقت حسب رأيي يعني، كتمشية ساعتين، وكتسوق من ثلاث ساعات، كثرة الفرفرة تبيّن لك البضاعة الزينة وأشكال مختلفة لها، والجودة الحلوة.

في المرة الثانية شريت جراب كفر لجوالي، شفاف والثاني مخمل، هذي صورته المخمل، أسعار الكفرات مرره رخيصة، شريت الشفاف ب10 ريال، والمخمل ب15 ريال، وأهلي شروا جرابات بعد، أغلى شيء شريناه ب20 ريال! طلعت من عندهم مغبونة من أسعار المحلات اللي عندنا.

وعندهم تشكيلات كثيرة وألوان كثيرة، بالنسبة لجوالي هواوي سألت كم محل ماعندهم لين لقيت محل عنده جرابات الهواوي. لا تفوتكم جرابات الجوالات، وبيوت سماعات الإيربودز شفت أشكال حلوة لها.

بكل المرتين استمتعت بالمشي واني اشوف المحلات، مع ان ما كان لي نية بالشراء يعني بس تمشية، بس يونّس صراحةً، ويمكن لأني أحب المشي استمتعت؟ ممكن.

السلبية الصغيرة في السوق، قد لا تكون سلبية بحد ذاتها، أغلب اللي يشتغلون في المحلات إذا مو كلهم يتكلمون إنقلش، فيعني مهم يكون عندكم معرفة بالأسئلة العامة مثلاً عن السعر أو اسم المنتج اللي تبونه وكذا يعني. بس ممكن تشوفون أفراد قليل يفهمون عربي.

بعطيكم أفضل المحلات اللي زرتها، من كل قسم، شفت في بعض المحلات القطع اللي أبي أحطها بغرفتي المستقبلية إن شاء الله.

مرينا على محل عطور مره عجبني، بس لأني كنت مكتفيه ماشريت، بس سجلت عندي اسم العطر واسم المحل، اسم المحل رحال المالكي، اسم العطر السمو الملكي، وعندهم عطور فخمة وأسعار حلوة.

بالنسبة لمحلات الإضاءة والمرايا،

محل اسمه Alrambo عندهم أنواع إضاءات وأفياش بأشكال مختلفة.

وثاني اسمه Alfiaz حبيت من عندهم المرايا اللي فيها إضاءة، المربعة بالذات تجنن، وعندهم أشكال ثانية ومنتجات حلوة.

فيه محل اسمه ASNA home decorations هذا المحل بالذات يجنن مرره، كبير وعندهم منتجات منزلية حلوة، على ما أذكر تحف وطاولات المنفردة وصواني الفخمة، ولوحات وتعليقات الأبواب، ومنتجات كثيرة.

وهذا محل نفس الفكرة بس قد يكون أصغر، اسمه Home creations.

وهذا محل نفس فكرة اللي فوق، اسمه Li Ying، عندهم قطع منزلية وللمطبخ حلوة وأشكال حلوة.

ونفس الشيء هذا المحل Double shing.

محل كفر الجوالات اسمه Sotom inter. Trading أغلب محلات الكفرات أسعارها متقاربة مره.

فيه محل ألعاب أطفال، أخذت بطاقته لسبب واحد، شفت عندهم بيت ألعاب.. يشبه حجم بيت باربي بس صناعته غير، قوية مش من بلاستك أو الشكل اللي متعودين عليه لبيوت الألعاب جدًا عجبني، غالية شوي بس حلوة بصراحة، وعندهم بعد زحاليق ومراجيح الأطفال ونطيطات، اسم المحل Song toys.

وبعد I toys Baily محل ألعاب.

شفت محل أزياء نسائي من مصممة كويتية، اسمها حنين الكويتية، جلابياتها طولها ميدي وفيه أطول جدًا حلوة، هذا حسابها انستغرام @Haneen.q88.

وهذا محل اسمه Feng teng ازياءه حلوة. وبعد Future Legend حلو.

وبالنسبة للفساتين، هذا المحل أعجبني فيه الفساتين اسمه Meng Sisters، وبعد H GCC فساتينهم أنيقة.

وهذا محل جلابيات حلوة وعجبتني مره اسمه Zoe.

وبالنسبة للشنط، هذا محل عنده أشكال شناط وأنواع لليد وللظهر، اسمه Shachi، وعندهم أكياس أنيقة.

وبعد هذا Selamy، وهذا شناطهم حلوة اسمه Torino، وبعد هذا محل عندهم تقليد لماركة تيد بيكر أنواع الشناط وأشكالها، اسمه Ka ka spring.

وللبس الأطفال والصغار، هذا المحل عنده بضاعة حلوة، اسمه Yung ying. ماحرصت على محلات الأطفال مدري ليش، بس بالسوق فيه خيارات كثيرة بتلقونها.

نصايحي إذا بتروحون له:

نصيحتي الأهم قبل ما تجون السوق، الاستعداد النفسي للمشي، والروقان، وتجون لهدف القهوة، والترويق.

إذا ناوين تشترون شيء لا تكتفون من أول شكل أو أول محل، فرّوا وشوفوا أكثر لين تشوفون المناسب لكم من ناحية المنتج وشكله والسعر بعد.

مهم تقرون اراء وتعليقات الناس في قوقل ماب، بس الأهم ماتعتمدون عليها بشكل أساسي، بس تستفيدون من تجاربهم، يعني لا تخلون التجارب الفردية السيئة تمنعكم من زيارته.

حلو لو تروحون له بالنهار، عندهم منظر بالسقف جميل مع الشمس، تشوفونه بمكان التقاطع.

قبل ما أنهي، عندي أرقام المحلات اللي ذكرتها فوق، بس ماحبيت أذكرها عشان ماأكثر الكلام، ممكن تسألوني عنها في تويتر على الخاص، أو عندكم موقع السوق، يعرضون فيه موقع السوق وأوقات العمل، وأقسام السوق وأسماء المحلات وأرقامها، هذا هو الموقع.

موقع السوق الصيني في البحرين

اكتبوا اسم المحل في البحث ويطلع لكم رقمه، روحوا للقسم وابحثوا عنه حسب الابجدية.

حسابي في تويتر 

صفحتي في الآسك

أتمنى أنكم استمتعتوا بالتغطية والصور.

اشتركوا بمدونتي عشان يوصلكم كل تدوينة جديدة على إيميلكم الخاص، الاشتراك في آخر الصفحة. وانشروا هذا التدوينة مشكورين.

3 رأي حول “تغطية خاصة للسوق الصيني في البحرين.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s